Özbəkistan-Azərbaycan Dostluq Cəmiyyəti mədəni əlaqələrə töhfə verəcək

İyunun 17-də Daşkənddəki Nizami adına Pedaqoji Universitetdə Özbəkistan-Azərbaycan Dostluq Cəmiyyətinin növbəti iclası keçirilib.

İclasda Özbəkistan Prezidenti Aparatının mədəniyyət məsələləri üzrə məsul şəxsi Qaffar Mirzoyev, Özbəkistandakı Dostluq Cəmiyyətləri Şurasının sədri, akademik Saidaxror Qulamov, Nizami adına Pedaqoji Universitetin rektoru Şövkət Şaripov, Özbəkistandakı Mədəniyyət Mərkəzləri Assosiasiyasının rəhbəri Nasiraddin Maxomadiev, ölkəmizin Daşkənddəki səfirliyinin nəzdində fəaliyyət göstərən Heydər Əliyev adına Mədəniyyət Mərkəzinin direktoru Samir Abbasov iştirak edib.

Toplantıda Nizami adına Pedaqoji Universitetin rektoru Şövkət Şaripov Özbəkistan-Azərbaycan Dostluq Cəmiyyətinin yeni sədri, universitetin professoru Erkin Nuriddinov qurumun icraçı direktoru seçilib.

Heydər Əliyev adına Mədəniyyət Mərkəzinin direktoru Samir Abbasov çıxış edərək iki qardaş ölkə arasında mədəni və elmi əlaqələrin inkişafı, ali məktəblər və elm müəssisələri arasında təcrübə mübadiləsi, birgə konfrans və seminarların təşkili, qarşılıqlı konsert, teatr, mədəni proqramların reallaşdırılması ilə bağlı təkliflərini səsləndirib. Şövkət Şaripov fəaliyyəti müddətində Özbəkistan-Azərbaycan mədəni əlaqələrinin inkişafına töhfə verəcəyini, bu yöndə müxtəlif tədbirlərin həyata keçiriləcəyini bildirib.

Mədəniyyət.- 2013.- 19 iyun.- S. 3.